ខ្សែវីដេអូ «តើនរណាសម្លាប់ជាវិជ្ជា?»បញ្ចាំងនៅស្រុកបារាំងចប់នឹងបញ្ចាំងនៅ គណបក្សសមរង្ស៊ីចុងខែនេះ

ខ្សែវីដេអូ តើនរណាសម្លាប់ ជា វិជ្ជា បាន កំពុង ក្លាយជាចំណុចរសើប របស់រដ្ឋាភិបាល ក្រុងភ្នំពេញ ក្នុងការរារាំង មិនឱ្យ ចាក់បញ្ចាំង នៅតាម ទីសាធារណៈ ឫទីស្នាក់ការសមាគម ឬ គណបក្សឡើយ។ ខ្សែវីដេអូនេះ មាន រយៈពេល ៥៥ នាទី និង ៣៦វិនាទី ដោយបង្ហាញពី សកម្មភាពសោកនាដកម្ម ឃាតកបាញ់ សម្លាប់លោក ជា វិជ្ជា នៅតូបលក់កាសែតខាងលិចវត្តលង្កា និងសកម្មភាពបង្ហាញ ឃាតករ សិប្ប និមិត្ត និងសាក្សីផ្ទាល់ភ្នែក និងម្តាយក្មេករបស់ ប៊ន សំណាង ក៏ដូចជាទិដ្ឋភាព អាជ្ញាធរក្រុងភ្នំពេញ ដណ្តើមសពលោក ជា វិជ្ជា ៘

លោកស្រី មូរ សុខហូរ សមាជិកសភាមណ្ឌលកំពត នៃគណបក្សសមរង្ស៊ីបានថ្លែងប្រាប់អ្នកកាសែត
កាលពីថ្ងៃទី១០ ខែ ឧសភា ឆ្នាំ២០១០ថា ខ្សែវីដេអូ «តើនរណាសម្លាប់ជា វិជ្ជា?» នឹងត្រូវបានបញ្ជាំង
ប្រកួតប្រជែងជាមួយនឹងខ្សែភាពយន្តល្បីៗមួយចំនួននៅប្រទេសបារាំង ចាប់ពីថ្ងៃទី១២ ដល់២២ឧសភា ហើយភាពយន្តនេះនឹងត្រូវនាំយកមកបញ្ចាំងនៅទីស្នាក់ការគណបក្ស សម រង្ស៊ី នាពេល
ខាងមុខ ប៉ុន្តែលោកស្រីពុំបានបញ្ជាក់អំពីពេលវេលាបញ្ចាំងនៅថ្ងៃណាច្បាស់លាស់ទេ ។

លោកស្រីមូរ សុខហួរបានមានប្រសាសន៍ឱ្យដឹងទៀតថា នៅពេលដែលគណបក្សសមរង្ស៊ីបញ្ចាំង
ខ្សែវីដេអូ «តើនរណាសម្លាប់ជាវិជ្ជា?» នោះ គណបក្សនឹងអញ្ចើញមន្ត្រីមកពីរដ្ឋាភិបាលចូលរូម
ទស្សនាខ្សែវីដេអូនេះ។ លោកស្រីបន្តថា នៅពេលកំពុងទស្សនាប្រសិនបើមន្ត្រីរដ្ឋាភិបាលមើល
ឃើញចំណុចណាអាក្រក់ ឬមិនល្អធ្វើកិរារឹបអូសទៅ។

លោក រ៉ុង ឈុន ប្រធានសមាគមគ្រួបង្រៀនកម្ពុជាឯក រាជ្យនិងជាមិត្តភ័ក្តសពលោក ជា វិជ្ជា បាន
មានប្រសាសន៍ប្រាប់អ្នកកាសែតថា លោកក៏មានគម្រោងបញ្ចាំងខ្សែវីដេអូនេះ នៅពេលខាងមុខ
ដោយដំបូងបញ្ចាំងចែកក្រុមអ្នកសារព័ត៌មានជាតិ និងអន្តរជាតិទស្សនា នៅក្នុងទីតាំងសមាគម និង
ធ្វើសន្និសីទកាសែតផងដែរ។ លោកឱ្យដឹងទៀតថា នៅមុនពេលបញ្ជាំង សមាគមធ្វើ សេចក្តីជូន
ដំណឹងទៅសាលាក្រុងភ្នំពេញ ប៉ុន្តែមិនចាំបាច់សុំការអនុញ្ញាតពីក្រសួងវប្បធម៌វិចិត្រសិល្បៈនោះទេ
ដោយសារតែរឿងនេះ ជារឿងឯកសារ និងជំរុញឱ្យរដ្ឋាភិបាលធ្វើការស៊ើបអង្កេតចាប់ឃាតកពិត
ព្រមទាំងអ្នកបញ្ជាពីក្រោយខ្នងមកផ្តន្ទាទោសតាមច្បាប់។

លោកស្រីមូរ សុខហួរ បានឱ្យដឹងថា ខ្សែវីដេអូ តើនរណាសម្លាប់ជាវិជ្ជានោះពុំមានអ្វីដែលរដ្ឋាភិ
បាលខ្លាចមិនឱ្យបញ្ចាំងនោះទេ ព្រោះវាជាការជំរុញាអោយមានការចាប់ឃាតកមកផ្តន្ទាទោសតាម
ច្បាប់តែប៉ុណ្ណោះ។ គណបក្សសមរង្ស៊ីមានគម្រោងបញ្ចាំងវីដេអូនេះ ឱ្យក្រុមកម្មករកម្មការិនីបាន
ទស្សនា ប៉ុន្តែរដ្ឋាភិបាលនៅតែចចេស មិនអនុញ្ញាតដាច់ខាត៕