ការដកហូតតំណែងលោកហ៊ុនភឿងជារឿងផ្ទៃក្នុងគណបក្សហ៊្វុនស៊ិនប៉ិច

ទោះបីជាមាន ការលាបពណ៌ ផាត់ម្សៅឱ្យ លោកឧត្តមសេនីយ៍ ឯក ហ៊ុន ភឿង រដ្ឋលេខាធិការ ក្រសួងការពារជាតិ ថា មាន ទំនាក់ទំនង ជាមួយ គណបក្ស ប្រឆាំងយ៉ាងណា ក៏ដោយ ក៏បញ្ហានេះ ត្រូវបាន មជ្ឈដ្ឋាន ជាទូទៅមើល ឃើញ ថា «វាគ្រាន់តែជា លេសមួយ ដើម្បីបិទបាំងការពិត ខណៈ ដែលវិបត្តិ ផ្ទៃក្នុង គណបក្ស ហ៊្វុនស៊ិនប៉ិច កំពុងតែ ពុះកញ្ជ្រោល នោះ»។

លោក យឹម សុវណ្ណ អ្នកនាំពាក្យគណបក្សសមរង្ស៊ី និងជា អ្នកតំណាងរាស្ត្រមណ្ឌលភ្នំពេញបាន
មានប្រសាសន៍ទាក់ទងនឹងរឿងនេះថាការដកហូតដំណែង របស់លោក ហ៊ុន ភឿង បែប ហ្នឹងគឺជា
ទម្រង់នៃ «ការរើសអើងនយោបាយ»។

មិនតែប៉ុណ្ណោះលោក យឹម សុវណ្ណ បានបដិសេធផងដែរថា «លោក ហ៊ុន ភឿង គ្មានទំនាក់ទំនងអ្វី
ជាមួយគណបក្សសមរង្ស៊ីទេ។ ហើយនេះក៏ជាការចោទប្រកាន់ដោយគ្មានភស្តុតាងអ្វីទាំងអស់»។

គួរបញ្ជាក់ថា កាលពីថ្ងៃសុក្រក្នុងសប្តាហ៍កន្លងទៅលោក ហ៊ុន សែន នាយករដ្ឋមន្ត្រី​ នៃប្រទេស
កម្ពុជាបានប្រកាសដកហូតតំណែងពីលោកហ៊ុន ភឿង ដែលជារដ្ឋលេខាធិការក្រសួងការពារជាតិ
(កូតាគណបក្សហ៊្វុនស៊ិនប៉ិច)។

ក្នុងនោះលោកកែវ ពុទ្ធរស្មី ប្រធានគណបក្សហ៊្វុនស៊ិនប៉ិច បានមានប្រសាសន៍ប្រាប់អ្នកកាសែតថា
លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិចបានជូនដំណឹងមកលោកថា លោក ហ៊ុន
ភឿន បានដកចេញពីតំណែងរដ្ឋលេខាធិការក្រសួងការពារជាតិហើយ។

ប្រធានគណបក្សហ៊្វុនស៊ិនប៉ិចរូបនេះបានបន្តទៀតថា «លោក ញឹក ប៊ុនឆៃ បានប្រាប់ខ្ញុំថា សម្តេច
នាយករដ្ឋមន្ត្រីថា លោក ហ៊ុន ភឿន មានទំនាក់ទំនងជាមួយគណបក្សប្រឆាំង។ ហើយ ខ្ញុំក៏មិនមាន
ព័ត៌មានអ្វីលំអិតលើសពីនេះទៀតឡើយ»។

លោក កែវ ពុទ្ធរស្មី បានបញ្ជាក់ច្បាស់ថា គណបក្សហ៊្វុនស៊ិនប៉ិចមិនទំនាស់នឹងសេចក្តីសម្រេច
ក្នុងការដកហូតដំណែងលោក ហ៊ុន ភឿន ទេ។ ជាមួយគ្នានេះ យើងក៏មិនអាចសុំការបំភ្លឺណាមួយ
ពីលោក ញឹក ប៊ុន ឆៃ អគ្គលេខាធិការគណបក្សហ៊្វុនស៊ិនប៉ិចបានដែរ។

យ៉ាងណាក៏ដោយ លោក ហ៊ុនភឿនបានប្រាប់អ្នកកាសែតកាលពីថ្ងៃអាទិត្យថា លោកមិនដែលមាន
ទំនាក់ទំនងអ្វីជាមួយគណបក្សសមរង្ស៊ីទាល់តែសោះ។ លោកបានបន្ថែមទៀតថា «ក្នុងរយៈពេល
ប៉ុន្មានឆ្នាំចុងក្រោយនេះខ្ញុំមិនទាក់ទងជាមួយសកម្មជននៃគណបក្សប្រឆាំងសូម្បីតែម្នាក់ក៏មិនមាន
ផង»។

ចំណុចនេះហើយដែលធ្វើឱ្យអ្នកតាមដាននានាសង្ស័យថា ការដកហូតតំណែងរដ្ឋលេខាធិការ
ក្រសួងការពារជាតិពីលោក ហ៊ុន ភឿង អាចផ្តើមចេញពីវិបត្តិផ្ទៃក្នុងគណបក្សហ៊្វុនស៊ិនប៉ិចក៏ថា
បានដែរ, ឬមួយគណបក្សហ៊្វុនស៊ិនប៉ិចមួយនេះចង់ធ្វើ កំណែទម្រង់ស្អីទៀតទេដឹង ?

ប៉ុន្តែប្រភពព័ត៌មានចេញពីអង្គប្រជុំគណៈរដ្ឋមន្ត្រីកាលពីថ្ងៃសុក្រនោះបានបង្ហើបតាមកាសែតក្នុង
ស្រុកមួយថា លោកនាយករដ្ឋមន្ត្រី ហ៊ុន សែន បានថ្លែងថា «គណបក្សហ៊្វុនស៊ិនប៉ិចមានពីរ គឺហ៊្វុន
ស៊ិនប៉ិចរបស់ក្រុមញឹក ប៊ុនឆៃ ធ្វើការជាមួយរដ្ឋាភិបាល, ឯមួយទៀតជាហ៊្វុនស៊ិនប៉ិច លឺ ឡាយ
ស្រេង ធ្វើការជាមួយគណបក្សប្រឆាំង»។

ប្រភពព័ត៌មានដដែលនេះបានបន្តថា «ក្រុមនេះជើងម្ខាងធ្វើការជាមួយរដ្ឋាភិបាល និង ជើងម្ខាង
ទៀតធ្វើការជាមួយគណបក្សប្រឆាំង។ ហេតុនេះដកលោកឧត្តមសេនីយ៍ហ៊ុន ភឿង ចេញពីតំណែង
រដ្ឋលេខាធិការក្រសួងការពារជាតិតែម្តងទៅកុំឱ្យគាត់រវល់ពេក »។

ក្រុមអ្នកតាមដាននានាបានអត្ថាធិប្បាយថា ការដកហូតដំណែងរដ្ឋលេខាធិការក្រសួងការពារជាតិ
ពីលោកហ៊ុន ភឿង មិនទាន់ជាផ្លូវការនៅឡើយ ថ្វីបើការដកហូតនេះជាសម្តីប្រតិកម្មចេញពីមាត់
លោកនាយករដ្ឋមន្ត្រីក៏ដោយ។

រហូតមកដល់ពេលនេះ ខ្មែរម្ចាស់ស្រុក មិនទាន់អាចទំនាក់ទំនងសុំការបំភ្លឺពីលោក ញឹក ប៊ុនឆៃ និង
លោក លឺ ឡាយស្រេង ដើម្បីសុំការពន្យល់បានទេ៕