យួនមិនឱ្យពលរដ្ឋខ្មែរក្រោមចូលរួមបុណ្យព្រះពុទ្ធសាសនាលើទឹកដីស្រុកកំណើតរបស់ខ្លួន

អាជ្ញាធរ យួនកាល ពីប៉ុន្មានថ្ងៃ មុននេះ បាន ទប់ស្កាត់ មិនឱ្យ បងប្អូន ប្រជា
ពលរដ្ឋខ្មែរ កម្ពុជាក្រោម ចូលរួម អធិកអធម នៃ ពិធីបុណ្យ ព្រះពុទ្ធសាសនា
មួយ ដែលប្រារឰ ធ្វើឡើង នៅលើទឹកដី របស់ខ្លួនដែល ជាស្រុក កំណើត
របស់ ពួកគាត់ នោះ ទេ ។វិទ្យុសម្លេង ខ្មែរក្រោម ដែលបាន ផ្សាយ នៅតាម
គេហទំព័រ ពីសហរដ្ឋអាមេរិក កាលពីថ្ងៃទី២៦ខែ ឧសភា ឆ្នាំ២០១០ បាន
អោយដឹងថា ព្រះសង្ឃគណៈកម្មការ និងអាចារ្យវត្ត បឹងរ៉ៃ ស្ថិតនៅក្នុង
ភូមិបឹងរ៉ៃ ស្រុកថ្កូវ ខេត្តព្រះត្រពាំង បានរៀបចំពិធីបុណ្យបញ្ចុះសីមា
ចំនួន៣យប់ ៣ថ្ងៃ ទៅតាមប្រពៃណីទំនៀមទម្លាប់ ព្រះពុទ្ធសាសនានៃ
ជនជាតិដើមខ្មែរកម្ពុជាក្រោម ។

ពិធីបុណ្យនោះ ស្ថិតក្រោមការឃ្លាំមើលពីនគរបាលយួនដ៏តឹងរ៉ឹង និងបានប្រើប្រាស់គ្រប់មធ្យោ
បាយដើម្បីទប់ស្កាត់មិន ឱ្យបងប្អូនខ្មែរកម្ពុជាក្រោមមក ពីបណ្តាខេត្តផ្សេងៗចូលរួមទេ។

ពលរដ្ឋ ខ្មែរក្រោមម្នាក់បាន ប្រាប់ វិទ្យុដដែល កាលពីល្ងាច ថ្ងៃទី២៦ ឧសភា ឆ្នាំ២០១០ថា នៅក្នុង
ពិធីបុណ្យនោះ អាជ្ញាធរ យួន បានធ្វើឱ្យមាន ចលាចល ក្នុងគោលបំណងកុំឱ្យប្រជាពលរដ្ឋខ្មែរកម្ពុជា
ក្រោមចូលរួមបានច្រើនកុះករ និងបណ្តាលឱ្យមានអ្នកចូលរួមខ្លះខ្យល់គរដួលសន្លប់ និងស្លាប់មនុស្ស
អស់ជាច្រើនទៀតផង ។

ពលរដ្ឋរូបនោះ បានថ្លែងថា «ថ្ងៃ១២កើត ខែជេស ខ្ញុំបានធ្វើដំណើរទៅចូលរួមក្នុងបុណ្យបញ្ចុះសីមា
ហ្នឹង... មានមនុស្សសន្លប់ពីរបីនាក់ ជាក់ស្តែង ខ្មែរយើងហ្នឹងអាយុប្រហែល ៥០ឆ្នាំ...យួនវាអត់រៀបចំ
សណ្តាប់ ធ្នាប់ នៅទីនោះទេ»។

ប្រជាពលរដ្ឋខ្មែរក្រោម ជា ច្រើននាក់ ដែលចូលរួមនៅក្នុង ពិធីនោះ មានមកពីខេត្តមាត់ជ្រូក ខេត្ត
ពលលាវ ខេត្តឃ្លាំងជាដើម ដែលអ្នកខ្លះបានចូលក្នុងវត្ត និងអ្នកខ្លះចូលមិនបានទេដោយសារតែ
អាជ្ញាធរយួនបង្ក ភាពចលាចល ដើម្បីកុំឱ្យប្រជាពលរដ្ឋចូលទៅក្នុងវត្តបាន ។

ចំពោះអ្នកដែលបានចូល រួម ប្រឆាំង នឹងការហាមឃាត់នេះ ត្រូវអាជ្ញាធរយួន ហាមមិនឱ្យនាំយកវត្ថុ
ដែលពាក់ព័ន្ធជាមួយ នឹងព្រះពុទ្ធសាសនាចូលទៅក្នុងវត្តនោះទេ ។

នៅថ្ងៃទី២៥ ឧសភា ២០១០ អាជ្ញាធរយួនបានហាមឃាត់មិនអោយពលរដ្ឋខ្មែរកម្ពុជាក្រោមនៅ
ខេត្តមាត់ជ្រូកធ្វើដំណើរទៅចូលរួមក្នុងពិធីនោះទេដោយពួកគេបានដេញប្រជាពលរដ្ឋឱ្យចុះពីរថយន្ត
ឈ្នួល ដែលគ្រោងនឹងចេញដំណើរទៅចូលរួមក្នុងពិធីបុណ្យនៅខេត្តព្រះត្រពាំងនោះ ។

ខេត្តព្រះពាំង​ ជាឈ្មោះខេត្ត របស់ខ្មែរកម្ពុជាក្រោមដែលសព្វ ថ្ងៃនេះ យួនបានប្តូរទៅជាខេត្ត
ត្រាវិញ ។

លោកថាច់ សេដ្ឋា ប្រធានសហគមន៍ខ្មែរកម្ពុជាក្រោម និងជាអតីតសមាជិកព្រឹទ្ធសភានៃព្រះរាជា
ណាចក្រកម្ពុជាកាលពីអាណត្តិទី១ បានប្រាប់ខ្មែរម្ចាស់ស្រុក ពាក់ព័ន្ធនឹងអាជ្ញធរយួនហាមឃាត់មិន
អោយប្រជាពលរដ្ឋខ្មែរកម្ពុជាក្រោម ចូលរួមក្នុងបុណ្យព្រះពុទ្ធសាសនានេះថា ករណីនេះគ្មានអ្វីប្លែក
ទេ ពីព្រោះយួនគាបសង្កត់ធ្វើបាបពលរដ្ឋខ្មែរកម្ពុជាក្រោមរាប់ឆ្នាំមកហើយ ។​ លោកបានមាន
ប្រសាសន៍ថា «អាហ្នឹងវាជារឿងធម្មតា របស់យួនទៅហើយ តែងតែធ្វើការគាបសង្កត់ដល់ប្រជាពល
រដ្ឋខ្មែរកម្ពុជាក្រោមនៅគ្រប់កាលៈ ទេសៈគ្រប់ពេលវេលាទាំងអស់មិនដែលអោយខ្មែរក្រោមមាន
សិទ្ធិសេរីភាព ដើរហើ ឫទៅចូលរួមពិធីផ្សេងៗដោយសេរីទេ ទាល់តែមានរៀបចំពីរដ្ឋាភិបាលទើប
អាចទៅបាន ហើយបើនាំគ្នាទៅអញ្ចឹង គេតែងតែនាំគ្នាបារម្ភដោយសារតែគេចាត់ ទុកខ្មែរកម្ពុជា
ក្រោមជាមុខសញ្ញាដែលគេត្រូវតាមដាន និងគេតែងតែ មានការប្រុងប្រយ័ត្ន ។ ដូច្នេះហើយទើប
សិទ្ធិសេរីភាពខ្មែរកម្ពុជាក្រោមត្រូវគេរឹតបន្តឹងគ្រប់ពេលវេលាទាំងអស់» ។

នៅខែក្រោយនេះ សម្តេចឪ ព្រះនរោត្តម សីហនុ យាងទៅបំពេញព្រះរាជទស្សនកិច្ច នៅប្រទេស
យួនតាមការយាងរបស់អគ្គលេខាធិការបក្សយួន ។ ចំពោះបញ្ហានេះលោកថាច់សេដ្ឋាបានបញ្ជាក់
លោកគ្មានរំពឹងថា ព្រះរាជវត្តមាន របស់សម្តេចឪ និងសម្តេចម៉ែនោះ នឹងអាចនាំមកនូវភាពធូរ
ស្រាលជូនដល់បងប្អូនខ្មែរក្រោមទេ ។

លោកថាច់ សេដ្ឋា បានមានប្រសាសន៍ថា «ខ្ញុំមិនមានជំនឿទេគ្មានអ្វីដែលយួនបន្ថូរបន្ថយទេ រឹតតែ
មានការរឹតបន្តឹងថែមទៀត បើពីមុននៅក្នុងរង្វង់ឆ្នាំ១៩៨០ជាងមករហូតហ្នឹង មិនដែលមានវត្តមាន
ព្រះករុណាផង, យួនតែងតែលើកឡើង អំពីទំនាក់ទំនងរវាងខ្មែរកម្ពុជាក្រោមជាមួយព្រះករុណា
យួនចាប់ដាក់គុកច្រើននាក់, ហើយនរណាមានព្រះឆាយាល័ក្ខណ៍ព្រះករុណាឫក៏ទង់ជាតិខ្មែរហ្នឹង
ក៏ត្រូវបានយួនចាប់ដាក់ពន្ធនាគារដែរ...ហើយសព្វថ្ងៃនេះ ប្រជាពលរដ្ឋខ្មែរកម្ពុជាក្រោមណាគោរព
ស្រឡាញ់សម្តេចឪ ក៏ មិនហ៊ានដាក់តាំងព្រះឆាយាល័ក្ខណ៍ព្រះអង្គនៅក្នុងផ្ទះដែរ ពីព្រោះយួនតាម
ដានណាស់»។ ទោះយ៉ាងណាសកម្មជនខ្មែរ កម្ពុជាក្រោមខ្លះ មានការរំពឹង ថា ព្រះរាជវត្តមានរបស់
សម្តេចឪ និងសម្តេចម៉ែ នៅប្រទេស យួននាពេលឆាប់ៗនេះ នឹងនាំមកនូវភាពធូរស្រាលជូនដល់
បងប្អូនខ្មែរកម្ពុជាក្រោម ៕