មន្ត្រីសិទ្ធិមនុស្សមិនពេញចិត្តនឹងសកម្មភាពទាហានលើកគ្នាកាន់តែច្រើនទៅការពារដីឱ្យឈ្មួញ

ទន្ទឹមនឹង ការព្រួយបារម្ភ របស់ ប្រជាពលរដ្ឋ នៅ ឃុំ អមលាំង ដែល កំពុង ប្រឈម មុខ នឹងការ បាត់បង់ ដីធ្លី ដោយ សារការ រឹបអូស ឆៅៗ ពីសំណាក់ ក្រុមហ៊ុនស្ករស ភ្នំពេញ របស់ លោក លី យ៉ុងផាត់ នោះ មន្ត្រី ការពារ សិទ្ធិ មនុស្ស ក៏បានសម្តែង នូវ ការមិនពេញចិត្ត ចំពោះ ការបញ្ជូន ទាហាន កាន់ តែច្រើន ឡើងៗ មក ការពារ ដីឱ្យ ឈ្មួញ ដែរ។

មានសេចក្តីរាយការណ៍មួយបានឱ្យយើងដឹងថា ក្រុមហ៊ុនស្ករសភ្នំពេញរបស់ឧកញ៉ា លី យ៉ុងផាត់
សមាជិកព្រឹទ្ធសភា នៃគណបក្សប្រជាជនកម្ពុជាមិនដឹងជាត្រូវដងត្រូវផ្លែជាមួយទាហាន ឬយ៉ាង
ណានោះទេ ស្រាប់តែមកដល់តំណាក់កាលចុងក្រោយនេះគេឃើញទាហានលើកគ្នាកាន់តែច្រើន
ឡើងៗចូល មកដល់ដីកំពុងមានជម្លោះ ខណៈពេលដែលប្រជាពលរដ្ឋជាង៦០០០នាក់ក្នុងឃុំអម
លាំង ស្រុកថ្ពង ខេត្តកំពង់ស្ពឺ កំពុងធ្វើ ការតវ៉ាដើម្បីបញ្ឈប់សកម្មភាពក្រុមហ៊ុនកុំឱ្យឈូសឆាយ
តទៅ ទៀត។

ប្រជាពលរដ្ឋម្នាក់បានថ្លែងថា ប្រជាពលរដ្ឋបាននាំគ្នាធ្វើការហាមឃាត់បុគ្គលិកក្រុមហ៊ុនឱ្យបញ្ឈប់
ការឈូសឆាយជាបណ្តោះអាសន្ន ដើម្បីរង់ចាំគណៈកម្ម ការខេត្តចុះវាស់វែងឱ្យអ្នកភូមិជាមុនសិន។
ព្រោះកន្លងមកគណៈកម្មការខេត្តមិនទាន់បានចុះមកធ្វើការវាស់វែងឱ្យប្រជាពលរដ្ឋនៅឡើយទេ។

ប្រជាពលរដ្ឋដដែលនេះបានបន្តទៀតថា ទោះបីជាប្រជាពលរដ្ឋព្យាយាមរារាំងបុគ្គលិកក្រុមហ៊ុន
ស្ករសភ្នំពេញរបស់ឧកញ៉ា លី យ៉ុងផាត់ មិនឱ្យធ្វើ ការឈូសឆាយយ៉ាងណាក៏ដោយក៏គេនៅតែ
ស្តាប់ភាសាខ្មែរមិនបានដែរ។ ផ្ទុយទៅវិញបុគ្គលិកក្រុមហ៊ុនគេអាងកម្លាំងយោធានិងនគរបាលចាំ
ជួយការពារយ៉ាងច្រូងច្រាង។

តំណាងប្រជាពលរដ្ឋម្នាក់ទៀតឈ្មោះ ឆម ឆត បាននិយាយយ៉ាងដូច្នេះថា «កាលពីព្រឹកថ្ងៃសៅរ៍
មានទាហានជាង១៥០នាក់បានលើកមកបន្ថែមទៀត។ ហើយទាហានទាំងនោះមកពីកងវរសេនា
តូចលេខ៣១៣ អតីតកងពលតូចលេខ៣៧ ជាអតីតកងទ័ពខ្មែរក្រហម»។

លោក ឆម ឆត បានឱ្យដឹង ទាំងទោម្នេញទៀតថា​ «ខ្ញុំបារម្ភថា ខ្ញុំមិនអាចបញ្ចៀសអំពើហិង្សាបាន
ទេ បើសិនជាបុគ្គលិកក្រុមហ៊ុនមិនស្តាប់ពួកយើងជាអ្នកភូមិទេនោះ»។

មានការកត់សម្គាល់ថាក្នុងឃុំអមលាំង មានភូមិចំនួន១១ និងមានប្រជាពលរដ្ឋសរុបជាង២០០០
គ្រួសារកំពុងរងនូវផល ប៉ះពាល់ដោយសារក្រុមហ៊ុនស្ករសភ្នំពេញរបស់ឧកញ៉ា លី យ៉ុងផាត់ដែល
បានទទួលដីសម្បទានសេដ្ឋកិច្ចពីរដ្ឋាភិបាលក្នុងទំហំសរុបជាង៩០០០ហិកតា។

ទាក់ទិននឹងសកម្មភាពទាហានលើកគ្នាកាន់តែច្រើន ឡើងៗចូលទៅកាន់ទឹកដីកំពុងមានជម្លោះ
នេះ ត្រូវបានលោក អំ សំអាត មន្ត្រីស៊ើបអង្កេត ជាន់ខ្ពស់របស់អង្គការលីកាដូថ្លែងប្រាប់អ្នកកាសែត
កាលពីថ្ងៃសៅរ៍ថា​ យើងមានការព្រួយបារម្ភបំផុត បើសិនជាពួកគេ ប្រើប្រាស់ទាហានទាំងនោះ
ដើម្បីការពារប្រយោជន៍ក្រុមហ៊ុន។ ដូច្នេះអំពើហិង្សាអាចនឹងកើតមានឡើងជាមិនខាន ហើយប្រជា
ពលរដ្ឋអាចប្រឈមនឹង ការចាប់ដាក់គុកសាជាថ្មីទៀតមិនខានឡើយ។

លោក អំ សំអាត នៅតែ អះអាងថា «ប្រការដែលក្រុមហ៊ុនប្រញាប់ប្រញាល់អនុវត្តគម្រោងរបស់
ពួកគេបែបនេះ គួរតែអាជ្ញាធរបើកការស៊ើបអង្កេតរឿងរ៉ាវឱ្យបានច្បាស់លាស់។ ព្រោះពួកគេពុំទាន់
ទទួលបានឯកសារគ្រប់គ្រាន់តាមផ្លូវច្បាប់នៅឡើយទេ»។

ជាមួយគ្នានេះដែរ លោក ចាន់ សូវេត មន្ត្រីស៊ើបអង្កេតជាន់ខ្ពស់នៃអង្គការការពារសិទ្ធិមនុស្ស
អាដហុកបានមានប្រសាសន៍កាលពីថ្ងៃចន្ទម្សិលមិញថា ក្រុមហ៊ុនឯកជនរបស់ លី យ៉ុង ផាត់ បាន
ប្រើប្រាស់កម្លាំងមានសមត្ថកិច្ចដើម្បីការពារផលប្រយោជន៍ឯកជន,ដែលកម្លាំង មានសមត្ថកិច្ចទាំង
នោះបើកប្រាក់ខែពីរដ្ឋ។

លោក ចាន់ សូវេត បានបន្តថា កម្លាំងសមត្ថកិច្ចទាំងនោះ បានធ្វើជាកម្មករស៊ីឈ្នួលរបស់ក្រុមហ៊ុន
ទៀត «ដែលខ្ញុំគិតថា មេបញ្ជាការ ឬរាជរដ្ឋាភិបាលបានបញ្ជាឱ្យកម្លាំងសមត្ថកិច្ចធ្វើអញ្ចឹង។ វាជា
រឿងមួយអាប់ឱនដល់កិត្តិយសកងកម្លាំងខ្លាំងណាស់»។

លោកបានអត្ថាធិប្បាយថា ក្រុមហ៊ុន លី យ៉ុងផាត់ នេះមាន បញ្ហាច្រើនហើយ ហើយក៏បានប្រើ
ប្រាស់កម្លាំងសមត្ថកិច្ចច្រើនដើម្បីការពារនូវអំពើគំរាមកំហែងប្រជាពលរដ្ឋនោះ។ វាសាហាវហួស
«យើងខ្ញុំជាសង្គមស៊ីវិលមិនពេញចិត្តចំពោះទង្វើនេះទេ ហើយយើងខ្ញុំក៏មិនគាំទ្រពលរដ្ឋណាដែល
ទៅកាប់រុករានដីព្រៃ របស់រដ្ឋដែរ តែអាជ្ញាធរគួរពិចារណាទៅលើជីវភាពប្រជាពលរដ្ឋឱ្យបានច្រើន
ជាងការការពារប្រយោជន៍ឱ្យក្រុមហ៊ុន»។

លោក ចាន់ សូវេត បានមានប្រសាសន៍ថា ក្រុមហ៊ុនកុំយកពាក្យអភិវឌ្ឍន៍ ហើយត្រូវការកម្មករ
ច្រើនដែលអះអាងថា នឹងយកប្រជាពលរដ្ឋទៅធ្វើការនោះ។​ តាមពិតទៅនេះជាកាតព្វកិច្ចរបស់
ក្រុមហ៊ុន, ព្រោះនៅពេលណាមានក្រុមហ៊ុន គឺត្រូវតែមានកម្មករធ្វើការជាធម្មតា។ ប៉ុន្តែបើប៉ះពាល់
ដីស្រែចំការពលរដ្ឋ គឺត្រូវតែទូទាត់សំណងសមរម្យ មិនមែនជាថ្នូរយក ពួកគាត់ទៅធ្វើជាកម្មករ
អញ្ចឹងទេ។

លោកថាសមត្ថកិច្ចបានទៅប្រាប់ប្រជាពលរដ្ឋម្ចាស់ដីឱ្យបោះបង់ដីនេះទៅ, កុំដាំដំណាំអ្វីទៀត
វានាំតែមានបញ្ហាដាក់ខ្លួនទេ។ ហើយតាមពិតទៅការវាស់វែងដីនៅឃុំអមលាំងនេះ មានការគម្រាម
កំហែងប្រជាពលរដ្ឋសម្បើមណាស់។ម៉្យាងទៀតបើអ្នកណាហ៊ានចេញមុខប្តឹងគេនឹងចាប់ដាក់គុក។

ទង្វើបែបនេះ យើង (ចាន់ សូវេត ) យល់ថា រដ្ឋាភិបាលកម្ពុជាជាពិសេសអ្នកដែលគាំទ្រ ឱ្យមាន
ការអភិវឌ្ឍន៍ប្រកបដោយទំនាស់យ៉ាងក្តៅគគុកនេះ គឺយើងមិនគាំទ្រទេ ហើយយើងស្នើសុំឱ្យរដ្ឋា
ភិបាលពិចារណាឡើងវិញថា គួរតែបណ្តែតបណ្តោយឱ្យកើតមានបន្តទៀត ឬយ៉ាងណា ?

លោក ចាន់ សូវេត បានលើកឡើងថា ដោយសាររង់ចាំការវាស់វែងដីពីសំណាក់អាជ្ញាធរ និងក្រុម
ហ៊ុនធ្វើឱ្យប្រជាពលរដ្ឋមិនបានចេញទៅរកស៊ីក៏ត្រូវបង្ខំចិត្តលក់គោ-ក្របីដើម្បីចិញ្ចឹមឆ្នាំង។ លោក
ថា ប្រជាពលរដ្ឋនៅឃុំអមលាំងលក់គោ-ក្របីស្ទើរអស់ពីភូមិតែម្តង ព្រោះទីមួយពួកគាត់គិតថា បើ
ទុកគោវាគ្មានស្មៅឱ្យស៊ី ដោយសារក្រុមហ៊ុនយកដីពួកគាត់អស់ហើយ។ ទីពីរ បើមិនលក់គោ-ក្របី
ទេ ពួកគាត់នឹងត្រូវដាច់បាយព្រោះមិនបានចេញទៅរកស៊ីអ្វីសោះ។

លោក ចាន់ សូវេត បញ្ជាក់ច្បាស់ថា ខាងលោកជាសង្គមស៊ីវិលមិនទំនាស់នឹងរឿងអភិវឌ្ឍន៍ទេ តែ
រដ្ឋាភិបាលត្រូវគិតថាមានតែប្រជាពលរដ្ឋទេដែលរដ្ឋាភិបាលត្រូវគិតគូរមិនមែនក្រុមហ៊ុនទេ។ពីព្រោះ
ប្រទេសមួយដែលមានប្រជាពលរដ្ឋគាំទ្ររដ្ឋាភិបាលទើបរដ្ឋាភិបាលនោះ ដំណើរការទៅបាន។ តែ
បើប្រជាពលរដ្ឋមិនគាំទ្ររដ្ឋាភិបាលវិញ តើរដ្ឋាភិបាលដំណើរការទៅរួចដែរ ឬទេ ?

ទំនាស់ដីធ្លីនៅឃុំអមលាំង ស្រុកថ្ពង ខេត្តកំពង់ស្ពឺនេះ ដូចជាពុំទាន់មានដំណោះស្រាយណាមួយ
សមស្របគួរនឹងទទួលយកបានសោះ៕