ក្បួនបាតុកម្មប្រឆាំងនឹងការដកអភ័យឯកសិទ្ធិលោកសមរង្ស៊ី

សមាជិកសភាចំនួន២៤រូបរបស់គណបក្សសមរង្ស៊ីកាលពីព្រឹកម្សិលមិញ និង អ្នកគាំទ្ររាប់រយនាក់ទៀត ដង្ហែជាក្បួនដើម្បីប្រឆាំងទៅនឹងរដ្ឋសភាខ្មែរដក អភ័យឯកសិទ្ធិ របស់ លោកសម រង្ស៊ី ប្រធានគណ បក្សសម រង្ស៊ី ។ ក្បួននោះ បានចាប់ផ្តើមពីមុខមន្ទីររដ្ឋសភាឆ្ពោះទៅរង្វង់មូលរូបសំណាកសម្តេចសង្ឃ ជូន ណាត ហើយបត់តាមផ្លូវភ្លោះកាត់ពីមុខភូមិគ្រឹះរបស់លោកហ៊ុនសែន នៅវិមាន ឯករជ្យ ហើយវិលត្រឡប់តាមផ្លូវភ្លោះចូលទីស្នាក់ការកណ្តាលគណបក្សសម រង្ស៊ីក្រុងភ្នំពេញវិញ។

លោកយឹម សុវណ្ណ អ្នកនាំពាក្យគណបក្សសម រង្ស៊ី បានមានប្រសាសន៍ប្រាប់ ក្រុមអ្នកសារព័ត៌មាននៅពីមុខរដ្ឋសភា គឺមុនក្បួនដង្ហែចាប់ផ្តើមថា អ្នកតំណាង រាស្ត្រគណបក្សសមរង្ស៊ីទាំងអស់ធ្វើពហិការមិនចូលរួមប្រជុំសភាទេ ហើយ ប្រឆាំងដាច់ខាតនឹងការដកអភ័យឯកសិទ្ធិលោកសមរង្ស៊ីនេះ។

លោកយឹម សុវណ្ណ បានថ្លែង ថា «ការដកអភ័យឯកសិទ្ធិនេះ គឺជាការផ្តន្ទា ទោសឯកឧត្តមសមរង្ស៊ីយ៉ាងអយុត្តិធម៌បំផុត, ហើយការធ្វើនេះគឺជាការផ្តន្ទា ទោសប្រទេសជាតិខ្លួនឯង និងផ្តន្ទាទោសប្រជាពលរដ្ឋស្លូតត្រង់ដែលបាត់បង់ ដីធ្លីដោយសារតែការបោះបង្គោលព្រំដែនជាប់ប្រទេសវៀតណាមនេះ»។

តែការធ្វើពហិការរបស់អ្នកតំណាងរាស្ត្រគណបក្សសមរង្ស៊ីនេះ ប្រព្រឹត្តទៅតែ មួយថ្ងៃទេគឺថ្ងៃទី១៦ ខែវិច្ឆិកា ឆ្នាំ២០០៩, ហើយថ្ងៃបន្ទាប់នឹងចូលប្រជុំដដែល។ នេះបើតាមការអះអាងរបស់លោកយឹម សុវណ្ណ ប្រាប់ក្រុមអ្នកសារព័ត៌មាននៅ មន្ទីររដ្ឋសភាជាតិព្រឹកម្សិលមិញ។ លោកបានថ្លែងថា «ការប្រជុំសភានៅថ្ងៃនេះ (១៦ វិច្ឆិកា ២០០៩) ហាក់ដូចជាមានន័យតិចតួចណាស់ចំពោះការការពារ បូរណភាពទឹកដី និងការពារឯករាជ្យនៃប្រទេសកម្ពុជា។ យើងមានការសោក ស្តាយយ៉ាងខ្លាំងដែលរដ្ឋសភាធ្វើនេះហាក់បីដូចជាព្រងើយកន្តើយចំពោះការ ឈឺចាប់របស់បងប្អូនប្រជាពលរដ្ឋខ្មែរ ដែលរងគ្រោះដោយសារការបាត់បង់ដីធ្លី នៅក្នុងឃុំសំរោង ស្រុកចន្ទ្រា ខេត្តស្វាយរៀង ។ ហើយនៅមានបង្គោលព្រំដែន ជាច្រើនទៀតដែលបានបោះ, ហើយដែលយើងមិនទាន់ធ្វើការស៊ើបអង្កេតឲ្យ បានដិតដល់, ហើយព័ត៌មានលេចឭជាបន្តបន្ទាប់មកថា មានការរំលោភបំពាន មកលើទឹកដីប្រទេសកម្ពុជា ដែលយើងមិនគាំទ្រជាដាច់ខាត ចំពោះការអនុ វត្តន៍សន្ធិសញ្ញាបែបនេះ»។

ក្រោយពីក្បួនតវ៉ាប្រឆាំងទៅនឹងការដកអភ័យឯកសិទ្ធិលោកសមរង្ស៊ី ដែល បានឆ្លងកាត់ផ្លូវពីមុខលំនៅដ្ឋានលោក ហ៊ុន សែន ហើយវិលចូលទៅទីស្នាក់ ការកណ្តាលគណបក្សសមរង្ស៊ីនោះ, លោកយឹម សុវណ្ណ ក៏បានថ្លែងរិះគន់សា ជាថ្មីទៅលើទង្វើ របស់រដ្ឋសភាដែលដកអភ័យឯកសិទ្ធិ លោក សម រង្ស៊ី ជាអ្នក ស្នេហាជាតិពិតៗ និងជាអ្នកការពារផលប្រយោជន៍ប្រជាពលរដ្ឋ និងប្រទេស ជាតិ។ លោកយឹម សុវណ្ណ បានថ្លែងដោយមិនលាក់លាមថា ការដកអភ័យឯក សិទ្ធិលោកសម រង្ស៊ី នេះ ធ្វើតាមការស្នើសុំរបស់នាយករដ្ឋមន្ត្រីយួនថ្ងៃទី៤វិច្ឆិកា ២០០៩ ហើយរដ្ឋសភាខ្មែរបានដកនៅថ្ងៃនេះ គឺថ្ងៃទី១៦ វិច្ឆិកា ឆ្នាំ២០០៩ ។ លោកបានថ្លែងថា «ផ្តន្ទាទោសលោកសមរង្ស៊ីគឺជាការផ្តន្ទាទោសប្រជាពល​រដ្ឋខ្មែរទាំងមូល»៕