ខ្មែរនៅបរទេសប្រមូលផ្តុំគ្នាថ្កោលទោសរដ្ឋាភិបាលដែលធ្វើ ឲ្យបាត់បង់ដីស្រែកសិករនៅជាប់ព្រំដែនយួន

នៅសប្តាហ៍ក្រោយនេះ ប្រជាពលរដ្ឋខ្មែរជាច្រើននាក់រស់នៅសហរដ្ឋអាមេរិក និងកាណាដាគ្រោងនឹងជួបជុំគ្នាដ៏ធំមួយនៅពីមុខស្ថានទូតខ្មែរ ប្រចាំនៅទីនោះ ដើម្បីថ្កោលទោសរដ្ឋាភិបាលក្រុងភ្នំពេញដែលធ្វើឱ្យបាត់បង់ដីស្រែ របស់ប្រជា កសិករខ្មែរជាប់ព្រំដែនយួនដែលបណ្តាលមកពីការបោះបង្គោលព្រំដែនជាមួយ ប្រទេសយួន ។

តាមការអោយដឹងរបស់អ្នកគាំទ្រគណបក្សសម រង្ស៊ី នៅឯបរទេសកាលពីថ្ងៃទី២០ ខែ វិច្ឆិកា ឆ្នាំ២០០៩ បានឱ្យដឹងថា នៅថ្ងៃទី២៨ វិច្ឆិកា ឆ្នាំ២០០៩ ពលរដ្ឋ ខ្មែរជាច្រើននាក់នៅក្នុងប្រទេសចំនួន២ គឺសហរដ្ឋអាមេរិក និងកាណាដានឹង ជួបជុំគ្នានៅពីមុខស្ថានទូតខ្មែរដើម្បីធ្វើការថ្កោលទោស លោកនាយករដ្ឋមន្ត្រី ហ៊ុន សែន និងរដ្ឋាភិបាលរបស់គាត់ ដែលធ្វើមិនដឹង មិនឭ ចំពោះការបាត់បង់ បូរណភាពទឹកដីកម្ពុជាជាមួយនឹងប្រទេសយួន។

បើយោងតាមគំរោង ហើយបើសិនមិនមានការប្រែប្រួលទេនោះបងប្អូនប្រជា ពលរដ្ឋខ្មែរជាច្រើនគ្រោងនឹងជួបជុំគ្នានៅមុខអគារស្ថានទូតខ្មែរនៅទីក្រុងវ៉ាស៊ីន តោន និងនៅពីមុខស្ថានទូតខ្មែរនៅទីក្រុងអូតាវ៉ាប្រទេសកាណាដា។ ការ ប្រមូលផ្តុំគ្នាថ្កោលទោស និងរិះគន់រាជរដ្ឋាភិបាលលោកហ៊ុន សែន នេះ ធ្វើ ឡើងនៅកន្លែងពីរដាច់ដោយឡែកពីគ្នា ប៉ុន្តែនៅក្នុងពេលជាមួយគ្នាគឺចាប់ពី ម៉ោង១១ព្រឹក រហូតទៅដល់ម៉ោង៣រសៀលម៉ោងនៅសហរដ្ឋអាមេរិក និងកា ណាដា ។

សេចក្តីរាយការណ៍បានឱ្យដឹងទៀតថា ការតវ៉ានោះក៏នឹងសរសេរជាបដា ហើយពួកគេក៏នឹងនិយាយអំពីវីរភាពក្លាហាន របស់លោកសម រង្ស៊ី ផងដែរ ដែលដឹងអំពីទុក្ខលំបាក របស់ប្រជាពលរដ្ឋនៅភូមិនានា នៃឃុំសំរោង ស្រុក ចន្ទ្រា ខេត្តស្វាយរៀង ដែលបាត់បង់ដីស្រែដោយសារតែបណ្តាលមកពីការបោះ បង្គោលព្រំដែនរវាងខ្មែរ និងយួន។ ពួកគេក៏នឹងនិយាយដែរថា ហេតុអ្វីបានជា រដ្ឋសភាខ្មែរដកអភ័យឯកសិទ្ធិសមាជិកសភាខ្មែរ ដែលការពារផលប្រយោជន៍ ខ្មែរនិងការពារទឹកដីរបស់ខ្មែរនោះ៕