បើអាប់ភីស៊ីតបិទច្រកព្រំដែនមិនពិបាកហ៊ុន សែន ទេ តែពិបាកប្រជាពលរដ្ឋខ្មែរ

នាយករដ្ឋមន្ត្រី នៃប្រទេសកម្ពុជាបានបង្ហាញជំហរយ៉ាងម៉ឺងម៉ាត់សាជាថ្មីថា លោកមិនខ្វល់នឹងការព្រមានបិទព្រំដែនរបស់អាជ្ញាធរសៀមដែលផ្តើម ចេញ ពីនយោបាយការទូត នៃប្រទេសទាំងពីរកំពុងធ្លាក់ចុះដុនដាបនោះទេ។ ជាមួយ នឹងការប្រកាសជាសាធារណៈនេះ អាជ្ញាធរសៀមបានបណ្តេញប្រជាពលរដ្ឋ ខ្មែររាប់ពាន់រាប់ម៉ឺននាក់ ពីអាណាចក្ររបស់ខ្លួនជាបន្តបន្ទាប់ហើយ ។

លោកហ៊ុន សែន បានថ្លែងថា «កុំនិយាយ នរណាអីថា បិទស្អីណា ទណ្ឌកម្ម អីណា គេធ្លាប់ធ្វើ គេធ្លាប់ដឹង... ម៉ាពិភពលោកគេសង្កត់ក្បាលក៏មិនងាប់ផង។ កុំឯងចង់បិទព្រំដែនស្អី បិទខ្មោចអី, មើល៍អញបិទទំនិញទាំងអស់វិញ... សាក​លមើល ! អាងឡើង អាងគំរាម ប៉ុណ្ណឹងមានឥទ្ធិពលអី ពីដើមលើសហ្នឹងរយ ដង ពាន់ដង គេមិនខ្លាចផង ទៅខ្លាចអី អាប៉ុណ្ណឹងកុំទៅខ្វល់ពេក»។

មន្ត្រីគណបក្សសម រង្ស៊ី, អង្គការក្រៅរដ្ឋាភិបាល និងប្រជាពលរដ្ឋខ្មែរបាន និយាយថា ប្រសិនបើសៀមបិទច្រកព្រំដែនជាមួយនឹងកម្ពុជាមែន ប្រាកដ ណាស់វាគ្មានបញ្ហាជាមួយប្រមុខរដ្ឋាភិបាលហ៊ុន សែន នោះទេ ប៉ុន្តែវាមាន បញ្ហាជាមួយប្រជាពលរដ្ឋ ដែលរស់នៅតាមតំបន់ព្រំដែន កសិករខ្មែរ ដែលពឹង លើទីផ្សារលក់ស្រូវ ពោត សណ្តែក ល្ងរឱ្យសៀម និងមានពលករខ្មែររាប់សែន នាក់ដែលបានឆ្លងដែនខុសច្បាប់ចូលក្នុងស្រុកសៀមស្វែងរកទីផ្សារលក់កម្លាំង ពលកម្ម ដូចជាធ្វើជាកម្មករសំណង់ កម្មករបេះផ្លែឈើ កម្មករលីសែងជាដើម ដើម្បីប្តូរយកអាហារចិញ្ចឹមជីវិត៕