កម្លាំងរដ្ឋាភិបាលរារាំងការប្រមូលផ្តុំសម្តែងកំហឹងឈឺចាប់ចំពោះការឈ្លានពាន របស់សៀមមកលើទឹកដីខ្មែរ

នៅថ្ងៃទី១៥ កក្កដា ឆ្នាំ២០០៩ កម្លាំងប្រដាប់អាវុធរបស់រដ្ឋាភិបាលជាច្រើននាក់ត្រូវគេដាក់ពង្រាយបិទផ្លូវចេញចូលជុំ វិញបរិវេណអតីតអគាររដ្ឋសភា ចាស់ដើម្បីការពារកុំអោយក្រុមបាតុករខ្មែរស្នេហាជាតិប្រមូលផ្តុំគ្នាសម្តែងការឈឺចាប់ អំពីសកម្មភាពរបស់ទាហានសៀមឈ្លានពានចូលទឹកដីខ្មែរគម្រប់មួយឆ្នាំ។

លោក រ៉ុង ឈុន ប្រធានសហភាពសហជីពកម្ពុជាបានដឹកនាំពលរដ្ឋខ្មែរស្នេហាជាតិប្រមាណ១៥០នាក់ប្រារព្ធខួបមួយ ឆ្នាំនៃការឈ្លានពានរបស់កងទ័ពសៀមនៅតំបន់ប្រាសាទព្រះវិហារ។ ប៉ុន្តែគម្រោងនេះត្រូវបានខកខានវិញ ដោយសារ មានកម្លាំងប្រដាប់អាវុធរាប់រយនាក់បានបិទផ្លូវទៅកាន់អតីតអគាររដ្ឋសភាចាស់ និងត្រៀមលក្ខណៈបង្រ្កាបប្រសិនបើ លោក រ៉ុង ឈុន នៅតែដឹកនាំខ្មែរស្នេហាជាតិសម្តែងការឈឺចាប់ពីសកម្មភាពឈ្លានពានរបស់កងទ័ពសៀមមកលើទឹក ដីខ្មែរទៀត។

ទាក់ទងនឹងការដាក់ពង្រាយកម្លាំងប្រដាប់អាវុធរារាំងចំពោះការប្រមូលផ្តុំសម្តែងនូវការឈឺចាប់ពីការឈ្លានពានរបស់ ទាហានសៀមនេះ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តីបានថ្លែងក្នុងសន្និសីទកាសែតថា ការរារាំងមិន អោយមានការជួបជុំសម្តែងមតិរបស់ពលរដ្ឋខ្មែរនោះ មិនមែនជាគោលការណ៏របស់ទីស្តីការគណៈរដ្ឋមន្រ្តីទេ ប៉ុន្តែជា ផែនការការពារសន្តិសុខ ការពារសុវត្ថិភាពសង្គមរបស់អាជ្ញាធរដែនដី។

លោក ផៃ ស៊ីផាន បាននិយាយថា «អ្វីដែលលោក រ៉ុង ឈុន ធ្វើ យើងទទួល យើងស្វាគមន៏ទាំងអស់ ហើយយើងចាត់ ចែងអ្វីឆ្លើយតបទៅវិញក្នុងនាមទីស្តីការគណៈរដ្ឋមន្រ្តីហើយការងារទាំងនោះរដ្ឋាភិបាលបានធ្វើរួចទៅហើយ»។

គួររំលឹកថា សហភាពសហជីពកម្ពុជាតែងតែទទួលរងនូវការបង្រ្កាបពីកម្លាំងអាជ្ញាធររដ្ឋាភិបាល នៅពេលដែលមានការ ប្រមូលផ្តុំគ្នាសម្តែងការតវ៉ាដោយអហិង្សា ឬប្រមូលផ្តុំគ្នាហែញាតិដាក់ស្ថាតទូតយួន ឬសៀមពីការរំលោភឈ្លានពានមក លើបូរណភាពទឹកដីប្រទេសកម្ពុជាជាបន្តបន្ទាប់នោះ៕