សមរង្ស៊ី និងកឹមសុខាបញ្ជាក់ជំហរជាថ្មីម្តងទៀតពាក់ព័ន្ធនឹងការរួបរួមគ្នាជាគណ បក្សតែមួយ

គណបក្សប្រឆាំងដ៏សំខាន់ៗចំនួនពីរនៅក្នុងប្រទេសកម្ពុជា គឺគណបក្សសមរង្ស៊ី និងគណបក្សសិទ្ធិមនុស្ស បានបង្ហាញ នូវជំហរព្រមព្រៀងគ្នាយ៉ាងជាក់លាក់ថា នឹងច្របាច់បញ្ចូលគ្នាជាគណបក្សតែមួយដើម្បីប្រកួតប្រជែងដណ្តើមយកជ័យ ជំនៈនៅក្នុងការបោះឆ្នោតសាកលលើកក្រោយ។ ប៉ុន្តែមន្រ្តីជាន់ខ្ពស់គណបក្សប្រជាជនបាននិយាយថា ការបង្កើតគណ បក្សថ្មីនេះ មិនមែនជាការព្រួយបារម្ភសម្រាប់គណបក្សខ្លួនឡើយ។

លោក សម រង្ស៊ី បានមានប្រសាសន៏ថា ការប៉ុនប៉ងលើកនេះមានលក្ខណៈប្រាកដប្រជាច្បាស់លាស់ណាស់ ធ្វើអោយ បានមុនឆ្នាំ២០១២ គឺមានគណបក្សថ្មីមួយដែលនឹងមានបញ្ជីបេក្ខជនតែមួយ, ក៏ប៉ុន្តែនីតិវិធីមិនទាន់បានកំណត់នៅ ឡើយទេ។

មេដឹកនាំគណបក្សជំទាស់ទាំងពីរទើបតែបានវិលត្រឡប់ពីបំពេញទស្សនៈកិច្ចពីសហរដ្ឋអាមេរិកកាលដើមខែកក្កដានេះ ដែលនៅទីនោះមន្រ្តីនយោបាយទាំងពីរអះអាងថា បានជួបជជែកគ្នាខ្លះៗអំពីអនាគតនៃការរួបរួមបញ្ចូលគ្នា។

គម្រោងនៃការរួបរួមគ្នារបស់អ្នកប្រជាធិបតេយ្យនេះ បានធ្វើអោយមហាជនខ្មែរមានការចាប់អារម្មណ៏ថា រដ្ឋាភិបាល អាណត្តិក្រោយប្រាកដជាដឹកនាំដោយអ្នកប្រជាធិបតេយ្យ។ ក៏ប៉ុន្តែសម្រាប់គណបក្សប្រជាជនបានបង្ហាញជំហរថា មិន ព្រួយបារម្ភនឹងការរួបរួមនេះទេ, ហើយបើទោះបីជាការរួបរួមគ្នារបស់អ្នកប្រជាធិបតេយ្យលើកនេះមិនឈានទៅដល់ការ បែកបាក់ពេលបោះឆ្នោតលើកក្រោយ ក៏មិនអាចដណ្តើមជ័យជំនះពីគណបក្សប្រជាជនបានដែរ។

លោក ខៀវ កាញារីទ្ធ អ្នកនាំពាក្យគណបក្សប្រជាជនកម្ពុជាបានវាយតម្លៃទុកជាមុនថា បើគណបក្សជំទាស់ទាំងពីរ ច្របាច់បញ្ចូលកម្លាំងគ្នា ក៏នៅតែមិនអាចឈ្នះគណបក្សប្រជាជនបានដែរ។ លោកបានថ្លែងថា «ចំនួនមនុស្សទាំងអស់ ដែលចូលរួម និងចង់គេបញ្ចូល ឬក៏បញ្ចេញយ៉ាងម៉េចក៏ដោយ ក៏ចំនួនមនុស្សហ្នឹង វាមិនអាចអោយគណបក្សប្រជាជន បាត់បង់សម្លេងឆ្នោតបានដែរ»៕